Air Samarkand aviakompaniyasi faoliyatining birinchi yilida yo‘nalishlarini kengaytirib, bozorda mavqeini mustahkamladi va kelajakdagi rivojlanish uchun poydevor yaratdi.
2024 yilda aviakompaniya tomonidan 152,6 ming yo‘lovchi va 2,65 ming tonna yuk tashildi. 1237 ta reys amalga oshirildi. Muntazam reyslarning o‘rtacha yuklamasi 82%ni, charter reyslarniki esa 89%ni tashkil etdi. Yil boshida aviakompaniya xodimlari 180 kishini tashkil etgan bo‘lsa, yil oxiriga kelib ular 270 kishiga ko‘paydi, ulardan 54 nafari dastlabki tayyorgarlikdan muvaffaqiyatli o‘tgan va ekipajlar tarkibida ishga qabul qilingan yangi bort kuzatuvchilardir.
Yil davomida Jidda, Madina, Sharm-al-Shayx, Al-Ayn, Abu Dabi, Nyachang va Fukuok yo‘nalishlari ochildi. Mart oyida Istanbulga muntazam reyslar boshlandi. Aviakompaniya Dubay, Dehli, Dakka, Islomobod, Batumi, Tbilisi va boshqa shaharlarga alohida charter reyslarini ham yo‘lga qo‘ydi. Eng ko‘p talab qilingan yo‘nalish Jidda bo‘lib, unga parvozlar O‘zbekistonning beshta shahridan amalga oshirildi. Vetnam, Misr va Turkiyaga parvozlar yuqori talabga ega bo‘ldi.
Kompaniya yetakchi turoperatorlar EasyBooking va Crystal Bay bilan strategik kelishuvlarga erishdi, bu esa muntazam va charter reyslarni yo‘lga qo‘yishga imkon berdi. Yo‘nalish tarmog‘idagi barcha aeroportlarda yer usti xizmatini ko‘rsatish bo‘yicha shartnomalar imzolandi. Shuningdek, Hitit kompaniyasi bilan hamkorlikda zamonaviy IT-yechimlar joriy etildi.
2024 yil fevral oyida aviakompaniyaning Airbus A321 va A330-300 samolyotlarini o‘z ichiga olgan parki Airbus A321neo samolyoti bilan to‘ldirildi. Yozda aviachiptalarni to‘g‘ridan-to‘g‘ri band qilish imkonini beruvchi yangi sayt ishga tushirildi.
Air Samarkand Istanbuldagi EMITT va TURSAB, Almatidagi KITF va Toshkentdagi TITF kabi yirik xalqaro turistik ko‘rgazmalar va forumlarda ishtirok etdi. Bu orqali Silk Road Samarkand sayyohlik markazi va Air Marakanda (Samarqand aeroporti) bilan birga O‘zbekiston turistik salohiyati targ‘ib qilindi.
Dastlabki kunlardanoq Air Samarkand barcha xalqaro reyslarda raqobatbardosh tariflar, yuk tashish uchun belgilangan ko‘p miqdorli me’yorlar va issiq ovqatni taklif qilib, xavfsizlik va xizmat ko‘rsatish bo‘yicha xalqaro standartlarni joriy etmoqda. Aviakompaniya ekipajlari bir nechta tillarda gaplashadi va bortda qulaylik, ishonch va xavfsizlik muhitini yaratadi.
Aviakompaniya 2024 yil uchun belgilangan barcha maqsadlaridan oshib o‘tdi va jadallik bilan rivojlanishni davom ettirish niyatida. 2025 yilda havo kemalari parkini kengaytirish, shuningdek, yangi xalqaro yo‘nalishlarni ochish rejalashtirilgan. Bundan tashqari, aviakompaniya muhim charter dasturlarini saqlab qolgan holda, muntazam reyslar ulushini bosqichma-bosqich oshirishga o‘tmoqda.
Samarqand – Markaziy Osiyoning madaniy durdonasi va tarixiy Ipak yo‘lidagi muhim transport tuguni bo‘lib, yangicha ahamiyat kasb etib bormoqda. Shahar xalqaro sayyohlarga diqqatga sazovor tarixiy joylar va zamonaviy infratuzilmaning noyob uyg‘unligini taklif etib, faol tarzda modernizatsiya qilinmoqda. Mintaqada turizmni rivojlantirishni qo‘llab-quvvatlash aviakompaniyaning muhim vazifasi hisoblanadi.
Bosh direktor Zafar Butayevning ta’kidlashicha: “Birinchi yil biz uchun dadil qarorlar va muvaffaqiyatlar davri bo‘ldi. Biz aviatsiya startapi sifatida ish boshladik, ammo yo‘lovchilar va sayyohlik kompaniyalari uchun ishonchli hamkor sifatida o‘zimizni ko‘rsata oldik. Biz ajoyib marshrut tarmog‘ini yaratib, munosib xizmat ko‘rsatishga muvaffaq bo‘ldik.
Oldinda bizni taraqqiyot kutmoqda. Biz flotni ko‘paytirish, yangi yo‘nalishlarni ochish va Samarqandning ishbilarmonlik, madaniy, rekreatsion turizmning muhim markazi sifatidagi maqomini mustahkamlash, shu bilan birga, mamlakatimiz fuqarolari uchun xorijga parvozlarni ishonchli ta’minlashni rejalashtirganmiz”.
Ishning birinchi yili Air Samarkand uchun katta yutuqlar yili bo‘ldi, bu esa uning bozordagi mavqeini mustahkamladi. Aviakompaniya rahbariyati va uning jamoasi barcha yo‘lovchilar va hamkorlarga ishonch hamda qo‘llab-quvvatlagani uchun minnatdorchilik bildiradi. Aviakompaniya jamoasi kelajakka umid bilan qaraydi va 2025 yilda yangi cho‘qqilar sari intiladi.